Суруналыыс, публицист, СӨ 1-гы президенин көмөлөһөөччүтэ Иван НИКОЛАЕВ:

-       Босхо түҥэтиллэр хаһыат туһунан өйдөбүлү кытары быһа  ситимнээх хаһыат икки көрүҥэ баар:
- реклама хаһыата,
- саарбах биллэриилэрдээх таһаарыылар (холобура, путаналар өҥөлөрүн рекламалыыр дьоҕус сурунааллары Москваҕа босхо түҥэтэ сатыыллар, массыыналар капоттарыгар уурталыыллар).
"Саха Сирэ", "Якутия" уонна "Эдэр саас" курдук уруккуттан дьон ытыктабылын, сэҥээриитин ылбыт хаһыаттар итинник босхо түҥэтиллэр хаһыаттар категорияларыгар киирэн хаалбыттарыттан киһи хараастар.
Ордук "Эдэр саас" хаһыаты харыһыйа саныыбын.
Доҕорум, аатырар суруналыыс Иван Ушницкай төрүттээбит хаһыата этэ дии, кини редактор эрдэҕинэ "Эдэр саас" саҕа популярнай хаһыат республикаҕа суох тэҥэ этэ.
Чаҕылхай, талааннаах дьон кэлин буомуран ыалы кэрийэ барбыт кумалаан дьылҕатын кэппиттэрин курдук - саныырга ыарахан.
Тоҕо оннук "кумалаан" буолбуттарын ырытыы - ол туспа тема...

 

Владислав КАСЬЯНОВ, Нам улууһун “Эҥсиэли” хаһыат редакциятын дириэктэрэ:

-       Это начало конца для этих газет.

 

Афанасий ГУРИНОВ-Арчылан, “Күрүлгэн” сурунаал редактора:

- Босхо түҥэтиллэр буолбуттарын туох дии саныахпыный, олохпут биир чахчыта буоллаҕа. Оннук дьаһал ылыллан, олоххо киллэрэр үлэ бара турар. Бэйэм иккиэннэрин босхо ылар баҕалаахпын биллэрбитим, онон эрэнэ күүтэбин. Хаһыат ыларбар төһө эрэ үбү кэмчилиир буоллаҕым. Онон, элбэх киһи босхону суруйтарыаҕа, хайдах бары тииһэрбит буолла...
Устунан, бюджет харчытыгар тахсар бары хаһыат-сурунаал босхо кэлэрэ буоллар диэн баҕа санаалаахпын. Холобур, оҕолорго --  "Кэскил", "Чуораанчык", "Юность Севера", кырдьаҕастарга, кыамматтарга -- "Арчы-Забота" курдук.


Суруналыыс, суруйааччы Валерий ВАСИЛЬЕВ - Муттуххай Бороҥ:

-       Ким да аахпат буолан хаалбыт хаһыатын харчыга сыҥалыы сатаан баран, босхо түҥэтэн эрэллэр. Бюджет үрдүгэр олорор дьон тугу талбыттарынан дьаһайар буоллахтара. Былаас пиарданыан наада, хайыахтарай... Киһи кыайан өйдөөбөт балаһыанньата буола турар.


Суруналыыс, публицист, “Киин куорат” редактора Иван  УШНИЦКАЙ:

-       Чааһынай да, государственнай да хаһыакка үлэлээбитим. Чааһынай хаһыаты, ордук сахалыы тылынан тахсар хаһыаты бэйэ үбүнэн таһаарар олус уустук. Атын сирдэргэ, омук дойдуларыгар государственнай хаһыат суох диэн этэллэр даҕаны, биһиги республикабатыгар бюджеттан өйөбүлэ суох сахалыы периодика тахсара кыаллыбат. Реклама биэрээччилэр  биһиэхэ аҕыйахтар, кыахтаах тэрилтэ, киһи биир илии тарбаҕын иһигэр ааҕыахха сөп. Суолбут-ииспит, сыанабыт, орускуоппут - чааһынай тэрилтэ холугар сөбө суох уустук.

 Аны хаһыаты – нууччалыы да, сахалыы да тылынан тахсары - сахалар ааҕаллар. Саха хаһыатын сурутааччытын ахсаанын  да ылан көрүҥ – нууччалыы хаһыаттардааҕар үйэ тухары хас да бүк элбэх буолара.  Реклама биэрээччилэр наар нууччалыы тыллаах хаһыакка биллэриилэрин биэрэ сатыыллар. Дьиҥинэн нууччалыы хаһыаты сахалыы ааҕар дьон атыылаһаллар.

Босхо сурутууну ыытары саҕалаабыт икки улахан хаһыат  Саха сирин бэчээтин эйгэтигэр син биир дьайыылаах буолуоҕа. Ол төһө содуллааҕын кэм-кэрдии көрдөрүө. Билигин уруттаан, быһа түһэн сирэр да, хайгыыр да кыаҕым суох. Ол гынан баран, содулланыа диэн син биир этэбин. Аны ол босхо түҥэтиллэр хаһыакка, ити этэллэрин курдук, 16 балаһа тухары уураахтар, сокуоннар тахсар буоллахтарына, ааҕааччы сирэрэ биллэр – сурутуу ахсаана, босхотун да үрдүнэн, түһүөҕэ.  

Олоҕум устатын тухары хаһыакка үлэлээбит буолан, хаһыат бөх-сыыс буолан көтөҕүнэн быраҕылла, ыһылла сытарын көрдөхпүнэ сүрэҕим ыалдьар.  “Бюджет суотугар” дии-дии дьон аахпат хаһыатын ыһа-тоҕо бэчээттээһин, аматын да иһин, ороскуоттаах буоллаҕа. Бюджет диэн оттон – норуот харчыта буоллаҕа, ол эмиэ түгэхтээх, кээмэйдээх. Ити бастакыта.

Иккиһинэн, государство политикатын оҥорор, сырдатар, тарҕатар икки сүрүн суолталаах хаһыакка, хайдах икки государственнай тылыттан биирин билбэт дьон салайааччы буолан хаалбыттара букатын өйдөммөт.  Буолаары буолан - национальнай республикаҕа, икки тылы көннөрү билэр эрэ буолбакка, эҥкилэ суох билэр дьон салайааччы буолуохтаахтара. Саха олоҕун-дьаһаҕын ымпыгын-чымпыгын, өйүн-санаатын,  историятын, сиэрин-майгытын билбэт киһи хайдах бу дьоҥҥо государство политикатын кыайан тиэрдиэй?  Ити өйдөммөт.

***

Aartyk.Ru